A loita contra a exclusión social mediante a alimentación, un fin para alcanzar

Esta semana soubemos do lanzamento da Gran Recollida de Alimentos 2020, impulsada polos Bancos de Alimentos de toda España co obxectivo de recadar fondos para alimentar a persoas en risco de exclusión social. A pandemia engadiu grandes dificultades a moitas familias vulnerables que se atopan ante unha situación difícil.

O acceso á alimentación é unha forma de loita contra a exclusión social que garante unha comida digna para moitos individuos en risco. A Fundación Provincial Banco de Alimentos de Vigo leva anos procurando o acceso a este dereito básico, que moitas veces vese minguado por situacións difíciles de predicir.

Esta entidade sen ánimo de lucro recolle doazóns de alimentos, almacénaos, clasifica e logo distribúe a centros asistenciais de todo tipo que precisen desta axuda. Por tanto, a loxística é para un Banco de Alimentos unha necesidade de primeira orde.

O Plan Social de Ence Pontevedra, sensible a esta realidade, incorporou dentro da súa liña de axudas dirixidas á Loita contra a Exclusión Social, unha doazón para a adquisición dunha carretilla apiladora eléctrica e unha envolvedora de palets para a delegación provincial. Con esta colaboración, o Banco de Alimentos poderá desenvolver de forma máis áxil a súa actuación, contribuíndo a distribuír con maior rapidez os alimentos a aqueles que máis o necesiten.

A Fundación Provincial Banco de Alimentos creouse en Vigo hai 25 anos e conta con delegación na capital da provincia desde 2014. No que vai de ano, xa repartiu entre toda a comarca pontevedresa ao redor de 350.000 quilos de alimentos. Desde o inicio da pandemia e os efectos provocados pola crise sanitaria actual, a necesidade na zona de actuación desta delegación provincial incrementouse nun 30 por cento. Só en Pontevedra, atende xa a unhas 6.000 persoas vulnerables, a través dos 36 colectivos sociais cos que traballa.

Pero non só coa delegación de Vigo-Pontevedra colaborou o Plan Social de Ence. En Monte Porreiro existe tamén unha pequena entidade xestionada pola Asociación de Veciños da zona que viu apoiada o seu labor cunha doazón. Desde o inicio da pandemia, a demanda de alimentos desta institución aumentou un 37 por cento. O fin ao que vai destinada a citada axuda é o de solicitar, almacenar e distribuír os alimentos entre as entidades colaboradoras que o precisen, entre as que se atopan varias de Pontevedra cidade e Marín.

O Plan Social de Ence Pontevedra quere contribuír a loitar contra esta situación e garantir así que as persoas en situación vulnerable da comarca poidan contar con acceso a alimentos de calidade durante esta crise. Esta axuda, enmarcada dentro do noso compromiso social con Pontevedra, coexiste xunto con outras iniciativas postas en marcha polos empregados da biofábrica de Lourizán, quen cada Nadal colaboran co Banco de Alimentos nunha recollida especial a pé de rúa.